Þann 17. janúar næstkomandi stendur Íslenska matsfræðifélagið fyrir fundi þar sem kynntar verða tvær nýlegar rannsóknir er tengjast mati á skólastarfi.
Halldóra Pétursdóttir gerir grein fyrir niðurstöðum rannsóknar sinnar sem fjallar um matsaðferðir í leikskólum og tengingu þeirra við matsnálganir og matsstaðla. Hún var framkvæmd í leikskólum í Reykjavík á árunum 2009-2010 og styrkt af Reykjavíkurborg.
Halldóra Magnúsdóttir fjallar um niðurstöður meistararitgerðar sinnar sem ber heitið: „Bright start“: námsefni og kennsluaðferðir sem efla nemendur og móta góðan skólabrag. Bright Start er nýtt námsefni á Íslandi þar sem áhersla er á markvissa þjálfun vitrænna ferla hjá börnum. Í rannsókninni fylgdist Halldóra með kennslu þar sem Bright Start var notað og lagði mat á frammistöðu barnanna í völdum þáttum, fyrir og eftir kennsluna.
Fundurinn verður haldinn í Vindheimum á 7. hæð Borgartúni 12-14 frá klukkan 16.00–17.30. Allir velkomnir.